【除咗做氣功】後生過當年靠呢幾樣~


呂良偉同拍檔徐勤合資過千萬投資開辦抗衰老及健康管理中心,同時推出護膚品牌,今日喺中環舉行發佈會,獲圈中好友蘇永康、余安安、汪詩詩同汪圓圓等支持。

已經61歲嘅呂良偉被指凍齡,佢話自己都有保養兼做氣功,仲現場示範氣功推倒司儀,場面搞笑。呂良偉表示會將生意進軍大陸及東南亞市場,佢話:「其實脫髮或者大肚腩係可以改變,我覺得自己依家後生過當年嘅丁力。產品一定要大眾化,因為想更多人去用。」

蘇永康就話自己年輕呂良偉10年,笑言自己都要保養吓,講到蘇永康身形略肥,呂良偉笑話:「會幫到佢㗎,好適合用『隔空溶脂』。」呂良偉又指囝囝善揚正學習歐洲自衛術,並且有做健身,下月會一齊去歐洲旅行。

另外,余安安坦言運動有助抗衰老,一星期最少做3日運動,佢話:「我好為食,不過都會食得清淡,湯水好重要。」佢仲笑話兩個女都被感染,安安話:「我同佢哋講防曬好緊要,因為紫外光好傷皮膚,去玩到幾夜都好,一定要落妝先好瞓。」佢又大爆幼女讀書時會6點起床沖涼化妝,反而大女就會瞓多一個鐘,因為覺得睡覺最緊要。

另外,汪圓圓嘅媽媽亦有現身,保養得宜,圓圓話媽咪自小教佢哋唔好夜瞓同飲凍飲,不過自己唔乖,佢話:「依家3個都返學,安頓好小朋友瞓覺後,我就同老公睇戲。」問到會唔會再追小朋友,佢笑話:「有一次放學,三個喺車度一齊喊,嗰一刻就覺得要收工。」而汪詩詩就爆囡囡甄濟如步入青春期,依家會以朋友身份同個女傾偈,但內心就做返媽咪。

(蘋果日報)

【除咗做氣功】後生過當年靠呢幾樣~

log in

Captcha!

reset password

Back to
log in

喜歡我們的文章嗎?按個讚吧!

關 閉 視 窗

(370)

Choose A Format
Gif
GIF format